Peer-e-Kaamil ki Pehchaan

Huzoor Data Ganjbaksh Ali Hajweri RadiAllahu Ta’ala Anhu farmate hain Mai Apne Shaykh ke saath Azerbaijan ke ilake me safar pe tha. Toh ek jagah Aapne dekha ke kuch darwesh khade they sufiya waale jhubba pehankar, daaman pehlakar khade they, mang rahe they to zameendar log aake unki jholi me galla daal rahe they. Aap farmate hain Maine Apne Shaykh se pucha inlogo ne sufiya ka libas pehna hua hai par itne zalil kyu hogaye hain? Sufiya (Allah Waale) to bayniyaz hote hain par ye log itne zillat ki halat me kyu hain (ke bhik mangrahe hain)?

Data Sahab farmate hain Mere Shaykh ne jawab diya: Ye isliye itne zalil hogaye ke jis tarah inko duniya (daulat) ki talash hai kyunke inke jo peer hain unko mureedo ko talash thi!

Yaani farmaya jo jitna mureedo ki talash me maara maara firega uske mureed o khalifa duniya ki talash me maare maare firenge.

Mujhse kisine pucha ek ijlas me ke Kamil Peer ki pehchan kya hai?

Maine ek jumle me jawab diya: Kaamil ki pehchan badi aasaan hai : Wo jisey mureedo ki talash na ho!! (yaani naye naye mureed banane ke chakkar me na padey).

Jo mureedo ki talash me abhi tak firta hai uski mureedo ki talash abhi khatam nahi hui Allah ki Talash kab shuru hogi?

Mard-e-Haq ki pehchan ye hai ke jisey sirf Allah ki Talash ho!

Jise Allah ki Talash daamangeer hojaye, jis dilme Allah ki Muhabbat ki aag bhadak utthe, jisey Allah ki Muhabbat aur Allah se Milne ka Shauk paida hojaye, wo Usey chodke kisi aur ki talash me kyu aur kaise firega?

Bade Kaamil WaliAllah they Sehan e Kaaba me, Hazrat Khizr Alaihissalam unke saath baithe Ibadat karrahe they. Jab uthke chale gaye to kisine pucha Hazrat Khizr Alaihissalam Aapke saath baithe they, aapne Unse mulakat nahi ki na dhyan diya? iski kya wajah?

To unhone kaha mai maazrat kha hun (maafi chahta hun), mai Us Dhyan (Allah Ta’ala ki Yaad) se farig hou to kisi aur taraf dhyan du, mai Allah ke Dhyan me tha!

To jisey hamesha sirf mureedo ki talash hai yaani mere mureedo ki tadaad badhe ye dhyan hai hamesha to wo jhoota hai, jo sachha Peer aur Mard-e-Haq hai usey parwah nahi hoti kitne mureed hain kitne nahi, laakho mureed hain ya ek bhi nahi, kyunki uska dhyan to hamesha sirf Allah ki taraf hota hai!

Leave a Reply