Wali (Aulia)

♦ Wali ka ma’ana hai Dost.

››Auliya Allāh ALLĀH ta’ala ke wo Mo’min Saaleh Muqaddas bande hote hain jo Rab ke mehboob aur muqarrab wa pasandeeda hote hain jinko ma’arifat e ilāhi aur qurb e ilāhi ka ek khaas darja mila hai.

›› Wilaayat ki 3 qisme hain :

[1] Wilaayat e Fitari – Jo paida’ishi wali Allāh hote hain.

[2] Wilaayat e Kasabi – Jo apni ibaadat, riyaazat aur zohado taqwa se Allāh ke wali bante hain.

[3] Wilaayat e Wahabi (Ataai) – Jo kisi ki dua se wali Allāh bante hain (Kisi Wali Allāh ki ya Ahle bait Alaihissalaam /Aal e Rasool ki ya Peer ki ya Waalidain ki dua se).

›› Auliya Allāh har zamaane me hote hain aur qayaamat tak hote rahenge.

›› Ba’az Auliya Allāh Wilaadat (paida’ish) se hi zaahir hote hain, ba’az kuchh arse ke ba’ad aur ba’az wisaal (dunya se parda farmaane) ke baad zaahir hote hain.

›› Wilaayat ke bahot se Darjaat hote hain :

1). Ghaus

2). Qutub

3). Nuqaba

4). Awtaad

5). Abraar

6). Abdaal

7). Akhyaar

Ghaus Wilaayat ka sab se a’ala darja hai.

›› Duniya mae 1 Ghaus, 3 Qutub, 3 Nuqaba, 4 Awtaad, 7 Abraar, 14 Abdaal aur 300 Akhyaar hote hain.

Jab kisi Akhyaar ka wisaal hota hai ya us to ALLĀH ta’ala kisi Mo’min Saaleh ko Akhyaar banaata hai. Jab kisi Abdaal ka wisaal hota hai to Akyaar me se kisi ek ko Abdaal banaata hai. Jab kisi Abraar ka wisaal hota hai to Abdaal me kisi aik ko Abraar banaata hai. Kisi Awtaad ka wisaal hota hai to Abraar me se kisi aik ko Awtaad me banaata hai. Jab kisi Nuqaba ka wisaal hota hai to kisi Awtaad ko Nuqaba banaata hai. Jab kisi Qutub ka wisaal hota hai to Nuqaba me se kisi aik ko Qutub banaata hai aur Jab Ghaus ka wisaal hota hai to Qutub me se kisi ek ko Ghaus banaata hai.Aur in ki muqarrar ta’adaad utni hi rehti hai.

›› Har ilaake ke Abdaal ki kuchh khaas zimmedaari hoti hai jaise Baarish barsaana, Rizq taqseem karna aur Balaao ko door karna.